Treffende nuwe snit uit deur Hugo Nieuwoudt

“Net soos die sneeu weer op die berge sal lê, is my verwagting dat jy my sal sê; sien ons weer môre, sien ons dan weer, en dit is al wat ek vandag in hierdie hart begeer…” weergalm die treffende refrein van Hugo Nieuwoudt se nuwe enkelsnit, Net Soos Die Sneeu, wat pas vrygestel is.

“Net Soos Die Sneeu handel oor ’n man wat steeds vasklou aan die belofte, wat sy Pa aan hom as seuntjie gemaak het; dat hy sal terugkeer na die oorlog. ’n Klein seuntjie, wie se pa op die dag van sy vertrek na die oorlog, voor hom in die sneeu kniel, en met trane in sy oë’n pinky promise aan hom maak dat hy sal terugkeer na die oorlog, wat dan nooit gebeur nie,” vertel Hugo oor dié Afrikaanse pop/kontemporêre snit uit die pen van Werner Beukes.

Hugo hoop dat die publiek die snit goed sal ontvang, aangesien die publiek vra vir goeie lirieke en melodie lyne, iets wat Net Soos Die Sneeu beslis bied. Hugo brei uit: “Dis nuut, vars, ritmies en ’n vreeslik mooi hartsliedjie wat storie vertel. Ek het die liedjie onlangs getoets by die Innibos Fees en wat my geraak het, was die doodse stilte vir ’n sekonde of twee, na die liedjie gestop en dan die applous wat gevolg het. Dit was vir my’n teken dat die mense daarvan hou. Mense soek liedjies waarmee hulle kan assosieer of iets met betekenis. ’n Liedjie met ’n storie.”

Volgens Hugo lê die snit hom na aan die hart, omdat hy self pa is van twee seuns. “Die lirieke en melodie lyn is so mooi en sterk, veral die groei van die liedjie na die einde, dat ek dadelik ’n aanvoeling vir die liedjie gekry het. Dit het met my siel gepraat.”

Daar is ook ’n musiekvideo in die pyplyn, maar hieroor wil Hugo nog niks verklap nie. “Ons is nog druk besigmet ’n hartroerende storielyn,” verklap hy. Die musiekvideo sal later in September uitgereik word.

Intussen kan aanhangers solank na hul sneusdoekies gryp want jy gaan verseker ’n traan of twee pink wanneer jy na Hugo se nuwe snit luister.

Loer hier onder na een van sy musiekvideo’s:- Hugo Nieuwoudt – ‘Jy is Myne’

Enjoyed this post? Share it!

 

Leave a comment